Новата анкета пред американските избори покажа дека Камала Харис малку ја зголемува својата предност пред Доналд Трамп на национално ниво. Анкетата, исто така, покажа дека Харис има посилна поддршка кај жените, а Трамп кај мажите.
Демократската кандидатка за претседател на САД Камала Харис малку ја зголеми својата национална предност пред републиканскиот претседателски кандидат Доналд Трамп, според првата голема анкета по Националната конвенција на Демократите во средината на август.
Анкетата, спроведена од Ипсос за телевизијата ABC и весникот Вашингтон пост, покажува дека Харис има поддршка од 50 отсто од регистрираните гласачи на национално ниво, наспроти 46 отсто од Трамп. Меѓу оние кои планираат да гласаат, соодносот е 52 отсто спрема 46 отсто во корист на Харис. Треба да се напомене дека во истражувањето на јавното мислење беше предвидена евентуална статистичка грешка од 2%. Пред конвенцијата на почетокот на август, анкетата на Ипсос покажа 49 отсто поддршка за Харис и 45 отсто за Трамп меѓу регистрираните гласачи. Кај оние кои имаат намера да учествуваат на изборите, соодносот бил 51 спрема 45 отсто за демократот.
Поддршката на национално ниво не игра многу важна улога во борбата за Белата куќа. Имено, кандидатите повеќе се фокусираат на свинг државите, во кои односите меѓу демократите и републиканците се многу блиски. Неколку истражувања на јавното мислење во овие држави укажуваат на многу тесна борба, каде што разликата меѓу Трамп и Харис често е во рамките на маргината на статистичка грешка. Во споредба со Џо Бајден, демократскиот кандидат во голема мера ја зајакна демократската позиција во винг државите.
Белата куќа Фото: Ал Драго/РЕЈТЕРС
Машки и женски гласачи, секој на своја банка
Анкетата на Ипсос, која беше спроведена меѓу 23 и 27 август меѓу 2.500 возрасни Американци, исто така покажа силна родова поделеност. Харис ја консолидираше својата предност меѓу женските гласачи (51 до 41 отсто во нејзина корист), а Трамп меѓу машките гласачи (51 до 46 отсто во негова корист). По конвенцијата на демократите, истражувањето покажа голем пресврт кај белите жени, бидејќи Трамп имаше предност од 13 отсто меѓу нив на почетокот на август, но сега таа е само 2 отсто. Кај белите мажи неговата предност порасна од 13 на 21 процент.
Анкетата на Ипсос, меѓу другото, открива дека трансферот на независниот кандидат Роберт Кенеди Џуниор на Трамп не ја подобрил позицијата на републиканецот, туку дури и му користел на Харис. Во меѓувреме, демократскиот кандидат за потпретседател Тим Волц е сè уште многу попопуларен од републиканецот Џејмс Дејвид Венс. 42 отсто од сите гласачи имаат позитивно мислење за Волц, а 32 отсто за Венс.
Новата анкета покажува дека повеќето гласачи повеќе му веруваат на Трамп за клучните прашања во кампањата како што се економијата, инфлацијата и имиграцијата. Неговото водство пред Харис меѓу сите гласачи е осум проценти за економијата и инфлацијата, а девет проценти за имиграцијата. Харис ја намали предноста на Трамп по прашањето за борбата против криминалот, но Трамп сè уште има мало водство по прашањето за управување со војната меѓу Израел и Хамас.
