Министерот Тошковски потенцираше дека оваа заедничка кампања е значајна за унапредување на полициската соработка меѓу двете соседни земји и му се заблагодари на министерот Дачиќ за помошта што Министерството за внатрешни работи на Србија ѝ ја испрати на Македонија во гаснењето на шумските пожари.
– Денеска сме тука заедно со колегите од Србија да ја поддржиме превентивната акција „Вози одморен” и да испратиме порака дека е исклучително значајно да се фокусираме сите во превенција на несакани настани кои најчесто се случуваат од премореност на возачите. На долгите патувања како што е патувањето на годишен одмор, клучни се паузите за одмор, на секои 2 до 3 часа неопходно е правење пауза од барем 15-тина минути. Возачите да тргнат на пат одморени бидејќи заморот е голем непријател на безбедното возење. Статистиките покажуваат дека сообраќајните незгоди предизвикани од замор за жал најчесто завршуваат фатално – рече министерот Панче Тошковски.
Министерот за внатрешни работи на Србија, Ивица Дачиќ го изрази своето задоволство од оваа заедничка акција помеѓу Република Србија и Република Северна Македонија потенцирајќи го фактот што во текот на летната сезона се случуваат голем број сообраќајни несреќи со смртни последици, како и дека податоците покажуваат дека на патиштата во Србија во овој период речиси секој ден по две лица го губат животот во просек.
– За нас е многу важно да го спасиме секој човечки живот, особено животот на децата. Важно е возачите да возат одморени – српскиот министер и ја истакнал важноста од соработката со македонската полиција во оваа превентивна акција.
Во рамките на активноста на возачите кои во моментот ја минуваа границата им беа поделени вода и летоци со едукативни совети и рекламен материјал во рамките на кампањата „Вози одморен”.
