Инспектори од Служба за мобилни скенери спречија нелегален изнес на девизи на граничен премин Блаце во износ од 7.800 евра, откако при контрола на патник открија поголема сума непријавени девизи.
„Лицето е македонски државјанин кој патувал со автомобил со чешки регистарски таблички. Истиот на прашање на царинските инспектори дали има нешто да пријави одговорил дека нема ништо, при што е извршена контрола на возилото каде во неговата чанта се пронајдени вкупно 9.800 евра. Согласно Законот за девизно работење на патникот му се вратени 2.000 евра, што македонски државјани можат да ги изнесат од државата без да ги пријават, а останатите се задржани“, информира Царинската управа.
Против лицето е поднесена пријава за девизен прекршок.
„Ги известуваме граѓаните дека при излез од државата можат да носат ефективни странски пари во износ од 2.000 евра по лице. Доколку изнесуваат девизи во износ од над 2.000 евра, должни се да ги пријават на царинскиот орган со презентирање на потврда од банка или од менувачница. Девизи во вредност од над 10.000 евра не е дозволено да се изнесуваат“, известува Царина.
