Најпоразителниот аргумент против кандидатурата на Џозеф Бајден за претседател на САД не дојде од политичар или експерт, туку од холивудската ѕвезда Џорџ Клуни. Холивудскиот актер, истакнат демократ го повикува Бајден да се повлече од претседателската кампања.
Но, Џорџ Клуни, кој изрази остра и јасна позиција во авторски текст во Њујорк Тајмс, не е единствениот што се огласи.
Сè погласниот хор од демократи ги потопува надежите на претседателот да ја крене својата разнишана кампања повторно на нозе оваа недела.
Говорот на Клуни, како и на некои други истакнати демократи, дојде во време кога се чинеше дека Бајден се опорави од дебаклот на првата телевизиска дебата со Доналд Трамп, кога тој мрмореше и даваше нејасни и некохерентни одговори.
По неколкудневниот „црвен метеоролошки аларм“ меѓу демократите, некои конгресмени го поддржаа, а 81-годишниот Бајден се појавуваше на разни настани.
Меѓутоа, во средата, на 10 јули, пред почетокот на самитот на НАТО во Вашингтон, дојде до нов бран на убедување за Бајден или да се повлече од претседателската трка и да го остави местото на некој друг од Демократската партија или барем да ја одложи конечната одлука додека не заврши самитот на воено-политичкиот сојуз.
Во средата вечерта, Питер Велч од Вермонт беше првиот демократски сенатор кој отворено го повика Бајден да се повлече, „за доброто на земјата“, како што напиша тој во соопштението за печатот.
Бајден треба да има интервју за NBC News во понеделник.
Секој погрешен одговор, мрморење, несигурност или гаф, може во наредните денови да ги поддржи сите најмрачни тврдења на Клуни, еден од најагилните демократи во собирањето средства за кампањата.
Во текст објавен во Њујорк Тајмс, холивудскиот актер напиша дека падот на Бајден не е илузија, туку реалност.
„Џо Бајден со кој бев пред три недели на собирање средства во Лос Анџелес неодамна не беше Џо… од 2010 година. Тој дури не беше ниту Џо Бајден од 2020 година. Тој беше истиот човек што сите го гледаа во дебатата (со Трамп)“ – напиша Клуни.
Актерот заклучи дека Бајден не бил на висината на задачата да го победи Доналд Трамп во ноември.
Тврдењето од штабот на Бајден дека тој е изборот на демократите кои гласаа за него на прелиминарните избори е „во најмала рака неискрено“.
И, што е можеби најпоразително, тој вели дека секој истакнат демократ со кого разговарал го знае сето ова – без разлика дали се подготвени јавно да го признаат тоа или не.
– Можеме да ги закопаме главите во песок и да се молиме за чудо во ноември. Или можеме да ја кажеме вистината – истакнува Клуни.
Персоналот на Бајден ги отфрли коментарите на Клуни, истакнувајќи дека претседателот за кратко време сменил девет временски зони, од самитот на Г7 во Италија до настанот за собирање средства во Лос Анџелес.
Тие исто така додаваат дека Бајден неодамна имал сериозни несогласувања со ѕвездата и неговата сопруга, адвокатката за човекови права Амал Клуни, околу политиката на неговата администрација во Газа.
Написот на Џорџ Клуни во Њујорк Тајмс, објавен три недели по собирањето средства во Лос Анџелес, може да се смета како удар темпиран за максимален ефект.
Но, Клуни не е било која филмска ѕвезда.
Тој со години е моќен собирач на средства за демократите.
Имајќи предвид дека Калифорнија, а особено холивудската индустрија, е клучен дел од паричната база на партијата, коментарите на Клуни се многу реална закана за Бајден.
Коментарите на Клуни уследија по изразеното незадоволство од други големи финансиери на демократите, како што се претседателот на Нетфликс, Рид Хестингс и претседателот на IAC, Бери Дилер.
Актерот е вклучен и во партиската политика, со блиски врски со поранешниот претседател Барак Обама.
Тешко е да се замисли дека Клуни би се појавил на толку драматичен начин на страниците на Њујорк Тајмс, со директен напад врз актуелниот претседател, без да има барем премолчена поддршка од истакнати демократи.
Уживајќи во превирањата на демократите во средата вечерта, Трамп објави на социјалните мрежи за Клуни: „Тој се сврте како стаорец против вкочанетиот Џо, и така тоа се двајцата“.
Сè повеќе истакнати демократи велат дека Бајден треба да паузира, но има и такви кои се порезервирани.
Меѓу нив е и Ненси Пелоси, поранешна претседателка на Долниот дом на Конгресот, инаку, три години постара од Бајден. Иако таа повеќе не е врвен демократ во Конгресот, таа сè уште има значително влијание во партијата.
Пелоси рече дека критичарите на Бајден треба да ја држат устата затворена до крајот на самитот на НАТО оваа недела.
– Што и да мислите, не мораше да го изнесете додека не видиме што ќе излезе од тоа оваа недела – рече Пелоси.
Таа додаде дека Бајден треба брзо да донесе одлука дали да ја продолжи изборната кампања.
