Повеќе од 500 оклопни возила на израелските одбранбени сили (ИДФ) се оштетени за време на операциите во Појасот Газа од почетокот на војната минатиот октомври, објави израелскиот весник „Маарив“. Според весникот на хебрејски јазик, десетици од овие возила се целосно повлечени од употреба.
За да се справи со загубите, ИДФ формираше два логистички центри во Газа за поправка на возилата оштетени во борбите со движењето Хамас и другите палестински вооружени фракции во Појасот Газа.
Израел ја нападна Газа по ненадејниот напад предводен од Хамас на 7 октомври, во кој загинаа околу 1.200 Израелци и беа заробени повеќе од 200 други. Оттогаш, повеќе од 37.000 Палестинци се убиени, а речиси 90.000 се ранети во палестинската енклава.
„За израелските војници одговорни за транспортот на возилата се вели дека се физички и психички уморни. Ако бидат повикани да го окупираат јужен Либан, тие ќе бидат таму, но не во најдобра состојба“, вели „Маарив“ во својот извештај.
Војната во Газа, наводно, потрошила многу повеќе оружје и муниција отколку што ИДФ првично очекуваше, а употребата останува висока.
Во текстот се вели дека премиерот Бенјамин Нетанјаху и другите членови на израелската влада добиваат неделни ажурирања за статусот на воените резерви.
Неодамна, Нетанјаху се пожали на бројот на воени пратки што САД ги испратија до ИДФ, велејќи дека ова прашање треба да се реши. Тој исто така објасни дека израелските власти ќе работат на тоа да се здобијат со оружје на поразновиден начин.
Материјалните загуби на ИДФ не се изненадувачки со оглед на тоа што Хамас и другите фракции во Газа се силно вооружени со противоклопно оружје, вклучувајќи ја локално произведената ракетна граната Ал-Јасин 105, а имаат и широк опсег на противтенковски наведувани проектили, вклучувајќи го и советскиот „Малјутка“, противтенковски ракети од руско производство „Корнет“, „Буласае-2“ од севернокорејско, како и ХЏ-8Л од кинеско производство .
Локално произведените експлозивни направи, исто така, предизвикуваат голема штета на израелскиот оклоп во појасот.
Покрај ваквите материјални загуби, ИДФ досега загубила 316 војници за време на копнените операции во Газа и долж нејзината граница со повеќе од 1.900 ранети.
И покрај големите загуби, Нетанјаху сè уште не покажува вистински интерес за траен прекин на огнот што би можел да стави крај на крвавата војна и да ги врати израелските заложници во Газа.
