Рускиот претседател Владимир Путин го потпиша законот за ратификација на четири протоколи кои создаваат правна основа за реструктуирање на долговите на Србија кон Русија врз основа на низа меѓувладини договори.
Соодветниот документ беше објавен на порталот на официјалното објавување на правните акти, пренесе РИА Новости. Протоколите беа потпишани во Москва на 13 ноември 2023 година и во Белград на 21 ноември 2023 година.
Со протоколите се менуваат договорите за доделување руски државни извозни кредити за Србија од 11 јануари 2013 година и 19 октомври 2019 година, финансискиот заем од 10 април 2013 година, како и за подмирување на долгот на Србија кон Руската Федерација врз основа на обврски на поранешна Југославија од 10 октомври 2013 година и 17 март 2021 година.
Протоколите ги официјализираа договорите на двете страни за отплата на долгот на Србија кон Русија со рок на отплата од март 2022 година до март 2023 година, со доцнење на плаќањето без пресметување на пенали или други дополнителни камати, доколку се отплати во целост.
Од 1 септември 2023 година српската страна го исполнила тој услов, а плаќањата се вршеле во руски рубљи според договорот на двете земји.
Потребата за потпишување на протоколот настана поради проблеми поврзани со плаќањата во долари и евра како дел од сервисирањето на долгот на Србија, објасни заменик-шефот на Министерството за финансии на Руската Федерација, Владимир Количев.
Во овој поглед, двете страни се префрлија на пресметките во рубљи, наведува руската агенција.
За отплата од 1 март 2022 година до денот на потпишувањето на протоколот, долгот на Србија за извозни кредити изнесува 102,231 милиони долари и 1,944 милиони евра, за финансиски кредит 38,33 милиони долари, а за обврски на Југославија 2,96 милиони долари.
Како што се наведува, протоколите стапуваат во сила со денот на приемот на последното писмено известување дека двете страни ги завршиле потребните интерни процедури.
