Новак Ѓоковиќ има најмалку три недели пауза по операцијата на менискусот на десното колено, а сите се прашуваат кои се следните чекори за освојувачот на 24 Грен слем титули. Колку брзо Ѓоковиќ ќе се врати на теренот?
Ѓоковиќ во средата беше опериран во Париз, се помина како што треба, а првите прогнози се најповолни можни – пауза од три недели, јавува колегата Саша Озмо од Спорт Клуб Србија.
Сосема е извесно дека Ѓоковиќ ќе биде принуден да го прескокне Вимблдон кој започнува на 1 јули, но затоа настапот на Олимписките игри во Париз (од 27 јули) изгледа пореален.
„Ова е најдобрата варијанта во секоја смисла. Пред се, што Новак се одлучил на таков пристап, а охрабрува и тоа што се чини дека немало некоја поголема штета. Тој дел е само исчистен и отстранет“, изјави за СК Добросав Мелајац, долгогодишен физиотерапевт на српската скокачка во далечина Ивана Шпановиќ.
Ѓоковиќ освои олимписки бронзен медал во Пекинг 2008 година, двапати беше четврти (Лондон 2012 и Токио 2021), а во Рио де Жанеиро 2016 година беше елиминиран од Хуан Мартин Дел Потро во првото коло.
„Побогу, мислам дека е реално да настапи во Париз, имајќи ги предвид можностите и методите со кои располага Новак, со кои може се да забрза“, заврши тој за СК Мелајац.
Ѓоковиќ освои се што може да се освои во тенисот. Постави бројни рекорди и е најдобар тенисер во светот на сите времиња. Единствената титула што му недостига е онаа од Олимписките игри. Следната е за четири години, па Париз му е последна шанса да стане олимписки шампион. Мотивација сигурно нема да му недостига.
