Институтот за јавно здравје (ИЈЗ) објави практични совети за заштита на населението од инсекти. Иако препораките се наменети за општата популација, значаен дел од нив треба ги реализираат надлежните институции за комунална хигиена во општините или во Град Скопје.
– Правилно отстранете го отпадот и покријте ги контејнерите или кантите откако сте го отстраниле отпадот. Одржувајте ги септичките јами и одводните канали околу вашата куќа или зграда. Елиминирајте ја стоечката вода во олуците за дожд, сливниците, старите гуми, кофите, пластичните капаци, играчки или кој било друг сад каде може да се размножуваат комарците. Еднаш неделно, а пожелно е и почесто испразнување или менување на водата од кафезите за птици, фонтаните, базените, бурињата за дожд и саксиите за да ги уништите потенцијалните живеалишта на комарците. Отстранете ги старите гуми, искористените пластични шишиња, лименки и слично. Прекријте со мрежа или затворете ги сите садови што служат за складирање вода.
– Зелените површини, бавчите, балконите и терасите редовно да се одржуваат чисти.
– Фонтаните на јавни површини и базени потребно е редовно да се одржуваат, да се менува водата и да се одржат проточни. Детектирајте и во склоп на вашите можности елиминирајте или пријавете на соодветно место за отстранување на живеалиштата на комарците. Бидете ажурни за одржувањето на комуналната хигиена во близина на вашиот дом или на вашето работно место.
– Покријте ги сите процепи, дупки, јами во ѕидовите, вратите и прозорците за да спречите влегување на комарците. Проверете дали прозорците и вратите се во добра работна состојба. Целосно покријте ги количките за бебиња и креветите со мрежа или со лесно, памучно, аеробно платно. Користете електрични апарати што испуштаат средство кои ги уништуваат комарците. Користете клими во просториите каде престојувате.
– Носете светла боја што прекрива поголем дел на телото – со долги ракави и долги ногавици и која е удобна. Имајте на ум дека облеката со светли бои како што се жолта, портокалова, црвена и розова и цветните дизајни ги привлекуваат инсектите, особено пчелите, осите и стршлените, бидејќи тие често можат да ја помешаат со цвет и ненамерно да ве убодат. Неутралните бои како белата, зелената и светлите кафени нијанси се многу помалку привлечни за инсектите.
– Особено при излети на природа, на места со вегетација или на ризични места каде има или може да има појава на инсекти, како на пример контејнери, по проценка на граѓаните, да се стават чорапите во панталоните, убаво да се закопчаат за да се спречи преку слободниот простор меѓу облеката, комарците да дојдат до кожата.
– Козметичките производи може да привлечат инсекти, затоа треба да се избегнува користење козметика – парфем, крем, млеко за тело и средства за лична хигиена – сапуни и слично, со силен мирис.
– Мирисот на храната привлекува инсекти. Слатки, сладолед, овошје, засладени пијалаци, лубеница и туна се само дел од видовите намирници што ги привлекуваат инсектите. Внимавајте кога ги консумирате овие и слични намирници. Покријте ја храната и пијалаците кога јадете на отворено – инсектите можат да влезат во отворени шишиња или лименки од кои пиете. Храната чувајте ја во затворена и термоизолирана средина.
– По ваша проценка, откриените делови на телото намачкајте ги со средства за одбивање на комарци – репеленти. Користете репеленти против комарци регистрирани од надлежните институции на Северна Македонија, внимателно следете ги упатствата и мерките на претпазливост на етикетата и секогаш консултирајте се со вашиот лекар или фармацевт. Додека прскате инсектициди, фокусирајте се на темните места како што се плакарите, под креветите и зад завесите. Редовно следете ги информациите од овластените лица и органи за состојбата околу болестите што се пренесуваат преку инсекти.
