Претседателката Гордана Сиљановска Давкова смета дека не го прекршила Преспанскиот договор кога ја давала свечената изјава во Собранието, односно кога одби да го изговори уставното име на државата.
– Јас го почитував Преспанскиот договор и сега го почитувам. Јас ја потпишав изјавата со актуелното име, името од Преспанскиот договор. Меѓутоа, јас исто така верувам во слободата на изразување на мислата, слободата на самоидентификација и слободата самоопределување која не само што може да биде колективна и да се однесува на народите, туку може да биде и индивидуална. Значи, за мене, слободата на мислата како дел од универзалната декларација за слободите и правата, како дел од Конвенцијата за заштита на слободите и правата, како дел од Конвенцијата на ЕУ за фундаментални права, им овозможува на луѓето да се изјаснуваат по сопствено наоѓање и јас не гледам тука дека сум го повредила Преспанскиот договор – изјави Сиљановска Давкова.
На прашањето дали ова може да се одрази на европската интеграција на Македонија, Сиљановска Давкова рече дека за тоа треба да се праша грчката страна.
