Целта на Европската унија (ЕУ) е да ги започне официјалните преговори за пристапување на Украина и Молдавија веќе на 25 јуни, кога се одржува самитот на Европскиот совет, изјавија за бриселски Политико неименувани дипломати од Брисел.
Кога лидерите на ЕУ ги отворија вратите за Украина и Молдавија во декември, потегот беше поздравен како прв чекор во историското проширување на Унијата.
Сепак, правниот чекор за почеток на преговорите за членство со Киев и Кишињев беше одложен неколку месеци поради стравувањата дека Унгарија ќе се спротивстави на тоа, како и поради загриженоста дека проширувањето на ЕУ може да стане главна тема на претстојните избори за Европскиот парламент.
Официјалното зелено светло за почеток на пристапните преговори со ЕУ би било голем поттик за Украина, која е во третата година од војната.
Пристапот на Киев кон Европа беше изговор за рускиот претседател Владимир Путин да се обиде да ја врати Украина во руската орбита, па патот на земјата кон членството во ЕУ да изгледа како поетска правда, пишува Политико.
Главна пречка на патот на евроинтеграциите на Киев и натаму е Унгарија, која се противи на членството на Украина во ЕУ бидејќи, меѓу другото, тврди дека има нерешени прашања поврзани со унгарските малцинства во таа земја.
Сепак, Киев води интензивни билатерални разговори со Будимпешта за решавање на тие прашања, за кои бриселските дипломати велат дека се наведени во документот од 11 точки.
По размената на мислења меѓу шефот на кабинетот на украинскиот претседател и унгарскиот министер за надворешни работи, Киев предложи решенија за сите прашања што ги посочи Будимпешта и сега се чека одговор. Со други зборови, пишува бриселскиот портал, Киев сака да покаже дека направил се за да ја задоволи Унгарија.
Напорите на Киев треба да се исплатат бидејќи Унгарија, која го презема ротирачкото претседателство со ЕУ во јули, можеби нема да сака пристапот на Украина да го засени нејзиното шестмесечно претседавање, рече еден дипломат.
Како што додаде, почетокот на официјалните преговори (со Украина) во јуни ќе и овозможи на Унгарија да се концентрира на другите приоритети на претседателството.Портпаролот на унгарскиот постојан претставник во ЕУ за Политико изјави дека фокусот на неговата земја е на преговарачката рамка.
„Првиот чекор е да се најде консензус таму“, рече тој, додавајќи дека би било „прерано“ да се зборува за датуми за меѓувладина конференција за почеток на преговорите за членство.
Проблемот би можел да го предизвика и Холандија, чија нова владејачка коалиција главно е против проширувањето. Но, времето овде може да има позитивен ефект бидејќи според извори запознаени со коалициските преговори во Хаг, новата влада можеби ќе профункционира до 25 јуни.
