Конфедерацијата на слободни синдикати (КСС) го прекина денешниот протестот пред Собранието поради, како што велат, притисоци врз членството, јави „Радио Слободна Европа“ (РСЕ).
Претседателот на синдикатот Благоја Ралповски изјави дека на вонреден состанок во синдикатот денеска ќе се одлучува за следните мерки, односно дали ќе се одржат најавените секојдневни едночасовни протести.
Тој за РСЕ изјави дека членовите на синдикатот се соочуваат со големи притисоци и закани дека може да ги изгубат работните места.
Синдикатот на 19 април најави секојдневни протести пред Собранието и Владата од 16 до 17 часот, доколку не се исполнат нивните барања. КСС бара зголемување на бодот на 103 денари во бруто износ со што најниската плата во јавниот сектор би била околу 18.200 денари и би се усогласиле останатите плати на сите во јавниот сектор.
Ралповски тогаш изјави дека со овој проблем се засегнати околу 100.000 работници во државата.
