Настапот со „палењето на шанкот“ во ноќниот клуб Монако во Карловац утрово околу 2 часот и 30 минути излегол од контрола и завршил трагично. Алкохолот се запалил на шанкот, се проширил меѓу гостите, а луѓето буквално почнале да горат, пренесуваат хрватските медиуми.
-7 лица побарале лекарска помош, 4 лица се тешко повредени, едно екстремно тешко и се наоѓа на одделението за интензивна нега, потврди директорката на Општата болница во Карловац, д-р Ивана Ковачиќ.
Директорката вели дека двајца од хоспитализираните пациенти имаат изгореници од втор степен, а едната е оквалификувана како тешка физичка повреда бидејќи на девојката и е повредено лицето, па поради можен респираторен стрес е на интензивна нега. Другата има изгореници на горниот дел од телото. Двајцата од повредените се на возраст од 22 години, а најстариот повреден е 41-годишник, соопштија од болницата во Карловац.
Порталот „Јутарњи лист“ стапи во контакт со Бернарда Ренко, која била во клубот Монако со нејзината сестра Викторија. Двете се повредени и сè уште се во шок.
– Келнерката го запали шанкот и не знам, запали кибрит, претпоставувам, огнот се прошири и кај нас, ми се запали целата лева страна од главата, односно косата. Видов дека еден од моите најдобри пријатели,Ивица гореше, се фрлаше и се тркалаше на подот, се обидувавме да го изгасиме. Сестра ми ја снема во тој момент, речиси беше згазена од толпата – рескажува девојката.
Таа вели дека ја видела девојка која е најтешко повредено и вели дека рацете и биле целосно изгорени.
– Сопственикот Гордан Фанчев дојде кај нас додека бевме надвор и ѝ рече на сестра ми која врескаше од болки: „Најдобро би било да си отидеш дома, бидејќи си пијана“ – вели Бернарда.
Таа наведува дека нејзината сестра има 15 конци, повредена е во стампедо предизвикано од паника. Бернарда има изгореници на левата рака.
Од ноќниот клуб Монако изразија жалење за инцидентот во кој се повредени десетина гости и на повредените им понудија помош.
