Израелскиот премиер Бенјамин Нетанјаху ја отфрли молбата на Џо Бајден да се откаже од планираниот копнен напад врз Рафах, последното засолниште за повеќе од милион раселени луѓе во Газа, но и град кој Израел го смета за засолниште на исламистичките борци на Хамас. Нетанјаху денеска им рече на парламентарците дека „совршено јасно му ставил до знаење“ на американскиот претседател дека Израел е решен да ја заврши елиминацијата на бригадите на Хамас во Рафах и дека тоа единствено може да се направи ако се влезе на тој терен.
Двајцата лидери разговараа вчера, а советникот за национална безбедност на Белата куќа, Џејк Саливан рече дека Вашингтон го смета копнениот напад за грешка и верува дека Израел може да ги постигне своите воени цели на други начини. Нетанјаху потврди дека има несогласување со Американците за потребата од влез во Рафах, но не и за потребата да се елиминира Хамас, додавајќи дека не гледа начин да се елиминира Хамас без да се уништат преостанатите баталјони.
Вашингтон покрена нова дипломатска иницијатива за прекин на огнот со цел да ги ослободи преостанатите заложници, повеќе од 100 од нив, по речиси 6 месеци, да испорача поголема помош во енклавата и да спречи гладување.
Американскиот државен секретар Антони Блинкен најави нова посета на Блискиот Исток каде што ќе се сретне со лидерите на Египет и Саудиска Арабија за да разговараат за „вистинската структура за траен мир“. Блинкен досега не спомна дека би можел да застане во Израел, а израелското Министерство за надворешни работи соопшти дека не биле информирани да ја подготват неговата посета.
Според Министерството за здравство на Хамас, во израелската офанзива на Појасот Газа загинале речиси 32.000 луѓе. Израел ја оспорува таа бројка и предупредува дека Хамас не го наведува бројот на загинатите борци.
Војната избувна откако Хамас изврши крвав напад врз кибуц во јужен Израел и музички фестивал на 7 октомври, при што беа убиени околу 1.200 луѓе и киднапирани 253.
Во два прекини на огнот, Хамас ослободи околу 100 заложници во замена за неколку стотици Палестинци од израелските затвори. Повеќе од 100 заложници, меѓу кои 19 девојчиња и 2 деца, сè уште се во заробеништво. Различни извештаи велат дека биле убиени 60 заложници.
Преговорите за прекин на огнот ќе продолжат оваа недела во Катар. Според информациите, ќе се разговара за шестнеделно примирје во кое Хамас би ослободил 40 заложници за неколку стотици палестински затвореници. Но Хамас засега не прифаќа привремено примирје, туку бара поширок план за целосно завршување на војната. Во спротивно, палестинската воена формација нема да ги ослободи заложниците.
Израел во последните недели извршува прецизни напади врз лидерите на тоа исламистичко движење. САД потврдија дека Израел во текот на ноќта го убил Марван Иса, заменик командант на военото крило на Хамас во Појасот Газа.
