28-годишна шпанско-бразилска туристка, наводно, била силувана, а нејзиниот сопруг тешко претепан од група од седум мажи минатиот викенд во источна Индија, откако биле нападнати додека биле на кампување. Полицијата веќе уапсила четворица осомничени, а по останатите се уште се трага. Случајот предизвика многу огорчени реакции и во Индија и во странство.
„Седум мажи ме силуваа. Не тепаа и ограбија, иако не преземаа многу работи, бидејќи во реалноста само сакаа да ме силуваат“, вели жртвата на нападот во видеото објавено на Инстаграм. Таа додаде дека мажите им се заканувале дека ќе ги убијат и двајцата, пренесува британски Би-Би-Си.
28-годишната девојка со бразилско и шпанско државјанство била на патување со мотор со својот сопруг кога биле нападнати додека кампувале во областа Думки во државата Џархад во источна Индија.
Полицијата соопшти дека уапсила четворица мажи и трага по уште тројца осомничени. Нивниот идентитет не е соопштен.
Бразилската амбасада во Индија за Би-Би-Си потврди дека жената и нејзиниот сопруг биле жртви на „сериозен криминален напад“. „Мораме да се обединиме во нашата посветеност да ставиме крај на насилството врз жените насекаде во светот“, соопшти шпанската амбасада во Њу Делхи во неделата на мрежата X.
Јавноста е револтирана
Групното силување предизвика бес и во Индија и во странство. Сексуалното насилство и силувањето станаа главен проблем во земјата, особено по групното силување и убиството на една млада жена во автобус во Њу Делхи во 2012 година, што предизвика големи протести и доведе до одредени промени во законодавството во оваа област.
Сепак, многу активисти во Индија велат дека има уште многу работа за да се решат отворените прашања за сексуалното насилство, пренесува Би-Би-Си.
Според Националното биро за евиденција на криминал, во 2022 година во Индија биле пријавени во просек по 90 силувања дневно.
Надлежните проценуваат дека има многу повеќе непријавени случаи, за што помага преовладувачката стигматизација на жртвите и недовербата во полициските истраги.
