Перу вчера прогласи вонредна состојба во поголемиот дел од земјата откако топлотниот бран и обилните дождови доведоа до пораст на случаите на Денга треска.
Бројот на починати од вирусот во оваа јужноамериканска земја годинава се зголеми на 32 – изјави вчера министерот за здравство Цезар Васкез.
Според него, вкупниот број на случаи во првите 8 недели од оваа година се зголеми на 31.300.
-Перуанската влада вчера го одобри предлогот за прогласување вонредна состојба. Има 20 региони, од 25, во кои ќе биде прогласена здравствена вонредна состојба поради Денга – им соопшти Васкез на новинарите, неколку часа откако кажа дека избивањето на епидемијата на Денга е „неминовно“.
Со декларација се зголемуваат ресурсите за здравствени услуги во погодените области.
Денгата, која главно се пренесува со каснување од заразени комарци, предизвикува симптоми како треска, гадење, повраќање, замор и болки во телото. Повеќето случаи забележани досега во Перу се на северот на земјата, каде болниците се веќе преполни.
-Времето создаде совршена почва за комарците да се размножуваат побрзо и да станат почест пренесувач на болести – рече Васкез.
Минатата година во Перу од Денга треска починале 428 лица, а според официјалните податоци биле заразени 269.216 лица.
