Рускиот претседател Владимир Путин би можел да се соочи со страшни последици откако опозицискиот лидер Алексеј Навални почина во руски затвор. Сега сите се сеќаваат како американскиот претседател Џо Бајден го предупреди својот руски колега во јуни 2021 година дека ќе се соочи со последици доколку Навални умре во затвор. Иако Бајден тогаш не кажа детално какви би можеле да бидат последиците, тој пред три години го предупреди Путин за тоа за време на нивната средба во Женева.
– Јасно му кажав дека последиците од тоа ќе бидат погубни за Русија. Што мислите дека се случува кога тој вели дека не се работи за повреда на Навални, сите работи што ги кажува за да го рационализира третманот на Навални, а потоа тој умре во затвор… Се работи за доверба, за нивната способност да влијаат на другите нации на позитивен начин – рече тогаш американскиот претседател Џо Бајден.
Бајден денеска сè уште не се изјаснил во врска со смртта на рускиот опозиционер.
Алексеј Навални беше еден од најжестоките критичари на Владимир Путин и беше затворен во близина на Арктичкиот круг.
Руската федерална казнена служба во петокот соопшти дека на Навални му се слошило по прошетката, дека „речиси веднаш ја изгубил свеста“ и умрел набргу потоа.
„Преземени се сите мерки за реанимација, но не дале резултат. Лекарите констатирале смрт на затвореникот“ – се вели во соопштението.
Причината за смртта сè уште не е позната.
Неодамна беше објавено дека Навални добил лекарска помош откако се пожалил на неухранетост и други проблеми поради лекување во затвор.
