Мажот осомничен за кражба на мал авион од аеродром во близина на Сан Франциско се изјасни за невин на вчерашното рочиште и побара сам да се застапува. Судијата го одби неговото барање, пресудувајќи дека тој не е квалификуван да дејствува како свој адвокат.
Луиз Густаво Аирес (50) наводно го украл авионот, а потоа слетал на плажа во Калифорнија. Притворен е со кауција од 10.000 долари и се соочува со 3 прекршочни пријави за поседување туѓ документ за идентификација, откако властите во неговиот ранец пронашле кредитни картички и лични карти на други лица.
Обвиненијата доаѓаат помалку од една недела откако властите добиле извештај во четвртокот навечер за мал авион кој слетал во близина или на плажа во заливот Халф Мун, мал град на брегот на Калифорнија, јужно од Сан Франциско.
Кога полицајците пристигнале во областа, го нашле едномоторниот авион во чудна положба, но неоштетен и празен. Набргу пронашле и привеле 50-годишен маж од Мајами кој одговарал на описот на лицето што се гледало како се оддалечува од авионот.
Властите велат дека авионот бил украден од аеродромот Пало Алто во близина на јужниот крај на заливот Сан Франциско. Според Федералната управа за авијација, авионот е регистриран на инструктор по летање во Пало Алто.
