Вработените во германскиот национален авиопревозник Луфтханза ќе штрајкуваат оваа среда, соопшти денеска синдикатот Верди, во последниот од серијата штрајкови во германскиот транспортен сектор бидејќи работниците бараат повисоки плати.
Штрајкот треба да започне во 4 часот наутро во среда и да трае до 7:10 часот во четврток, се вели во соопштението на синдикатот. Најпогодени ќе бидат аеродромите во Франкфурт, Минхен, Хамбург, Берлин и Дизелдорф.
Портпаролот на Луфтханза рече дека е премногу рано да се каже колку летови ќе бидат откажани, бидејќи авиокомпанијата го подготвува својот распоред на летови за вонредни состојби со прегледување на 3.000 дневни летови кои би можеле да бидат погодени од штрајкот.
– Но секако ќе бидат откажани многу летови – најави портпаролот на Луфтханза.
Во преговорите Верди бара зголемување на платите за 12,5% за 25.000 работници или најмалку 500 евра месечно повеќе во период од 12 месеци, плус еднократна исплата од 3.000 евра како компензација за инфлацијата.
Синдикатот тврди дека повисоките животни трошоци и големиот обем на работа поради недоволно кадар се основа за повисоки плати.
Персоналот на Луфтханза стапи во штрајк во јули 2022 година за време на последната рунда колективни преговори, предизвикувајќи големи нарушувања на патувањата.
Оттогаш, најголемата европска економија е погодена од серија штрајкови низ целата земја кои ги погодија воздушниот, железничкиот сообраќај и јавниот транспорт.
