Над десетина луѓе се повредени во Буенос Аирес во судири меѓу полицијата и учесниците на протестот против економските реформи на новоизбраниот претседател Хавиер Миле, јавуваат аргентинските медиуми.
Федералната полиција употребила гумени куршуми, солзавец и физичка сила, јавува аргентинската агенција „Пагина 12“.
Најмалку 60 демонстранти се повредени, а еден од нив, адвокат за човекови права, може да изгуби око, според агенцијата.
Долниот дом на аргентинскиот парламент во петокот, по неколкудневна дебата, го усвои предлогот за реформи на претседателот Хавиер Милај.
За усвојување на реформскиот пакет мерки гласале 144 пратеници, а против биле 109.
Неопходно е пакетот реформи да биде ратификуван во Сенатот на Аргентина каде за секоја од точките од пакетот ќе се гласа поединечно, доколку бидат ратификувани во Сенатот, реформите ќе овозможат отпуштања без образложение и драстично помали отпремнини, укинување на задолжителниот надоместок за прекувремена работа и глобите за фирмите што не плаќаат придонеси, се наведува.
Милеј се стреми да има ограничени права на штрајк и породилно отсуство, па според новите правила, бремените жени би можеле да отсуствуваат од работа само 10 дена пред породувањето, наместо 45, како што е предвидено со сегашниот закон.
Реформите би ја ограничиле работата на синдикатите, а суспендирањето на работата во таканаречените клучни индустрии, како што се здравството, енергетиката и телекомуникациите, би било незаконско доколку не се обезбедат минимум 75 отсто од производството или услугите.
Помалку суштинските индустрии вклучуваат, меѓу другото, радио, телевизија, банкарство и финансии, каде што мора да се исполни 50 отсто од обемот на работа за прекинот на работа да се смета за легален.
Милеј тврди дека клучните реформи се насочени кон намалување на трошоците и зголемување на државните приходи за да се помогне во исполнувањето на овогодинешната главна цел – нула дефицит, бидејќи намерата на владата е да ги намали високите долгови и инфлацијата која надминува 200 проценти.
