Лидл денеска ја претстави својата најголема инвестиција во Северна Македонија, логистичкиот центар во близина на Куманово. Ова досега е највредна инвестиција на Лидл во земјава со вкупна вредност од 80 милиони евра, којашто ќе отвори повеќе од 150 работни места.
Според планот на компанијата, изградбата на логистичкиот центар треба да започне во следниот период, додека во моментов се одвива тендерската фаза за избор на генерален изведувач.
Претставниците на Лидл изразувајќи ја својата благодарност кон општината и кон владата за поддршката во целиот процес на реализација на оваа инвестиција, испратија порака за среќа и успех на проектот преку симболичен гест на поставување на временска капсула во темелите на објектот.
– Денеска ја претставуваме нашата најголема инвестиција во Северна Македонија, нашиот логистичкиот центар. Лидл Северна Македонија е дел од меѓународното семејство на Лидл и овде, заедно со нашиот тим, кој во моментов брои повеќе од 100 вработени, сакаме да го имплементираме искуството што го стекнавме во повеќе од 30 земји со ист стандард и ист квалитет. Ќе инвестираме околу 80 милиони евра само во изградба на логистичкиот центар за да создадеме модерен и одржлив објект, според најновите градежни стандарди. Лидл е одговорен, сигурен и фер партнер и за купувачите и за своите добавувачи. Дел од нашата корпоративна политика е воспоставување долгорочна и сигурна соработка со локалните производители – изјави Рубријан Хаџиев, генерален директор на Лидл Северна Македонија.
Парцелата во Куманово опфаќа површина од 170.997 метри квадратни, вклучувајќи логистички центар од 63.000 метри квадратни и комплекс со главна зграда, административни канцеларии и напредна инфраструктура. Конструиран според современи технологии и приспособен за ефикасно работење во голем обем, логистичкиот центар ќе биде опремен со специјализирани машини, системи за автоматизација и логистичка опрема, целосно посветени на оптимизација на операциите. Логистичкиот центар дополнително ќе биде пример за одржливо и еколошко работење, ќе користи електрична енергија од обновливи извори на енергија и ќе биде опремен со фотоволтаични елементи кои генерираат вкупна моќност од приближно 1,7 MW. Дополнително, за затворање на покривот ќе се користи материјал од рециклиран отпад, а внатре ќе се постави енергетски ефикасно LED осветлување. Објектот ќе се загрева со отпадна топлина од системот за ладење и целиот генериран отпад ќе се рециклира.
Покрај претставниците на Лидл, на настанот беа присутни и премиерот Димитар Ковачевски, вицепремиерот Фатмир Битиќи, министерот за внатрешни работи Оливер Спасовски, министерот за земјоделство, шумарство и водостопанство, Љупчо Николовски, градоначалникот на Куманово, Максим Димитриевски и германската амбасадорка Петра Дрекслер.
За премиерот Ковачевски, работењето на Лидл на македонскиот пазар значи потврда за вредноста и капацитетите на овој пазар и ја стимулира националната економија.
– Со инвестиција од 80 милиони евра и нови над 150 работни места во финалната фаза на нивното проширување, Лидл планира најголема, но и долгорочна инвестиција во нашата држава, која сметам дека ќе отвори големи перспективи како за нашата национална економија, така и за нашата држава која преку ваквите успешни бизнис модели ќе оствари поголем пробив на меѓународните пазари. Квалитетот на Лидл успешно се градеше во изминатите 50 години и денес мрежата на овој познат трговски ланец е распространета во повеќе од 30 земји во светот и со над 12.000 маркети. Лидл не е само обичен ланец на супермаркети, туку изграден бренд чии маркети во регионот се посетени и од многу наши граѓани бидејќи добиваат висок квалитет за поволна цена. Ние создадовме услови ова да го овозможиме дома – нагласи Ковачевски.
За градоначалникот на Куманово, Максим Димитриевски, подготвителните активности за градба значат и развој на индустриската зона Речица.
– Јас денеска како градоначалник сум среќен што имам чест да присуствувам на оваа манифестација на покана на инвеститорот и сакам да се заблагодарам на претставниците на Лидл, германската амбасада во државата и вработените во општина Куманово, јавните претпријатија и сите институции, кои дадоа позитивен придонес во подготовка и реализација на ваквиот проект, вклучувајќи ги и лицата кои беа вработени кај инвеститорот или ангажирани како фирми, кои беа логистичка поддршка. Без нивен личен ангажман немаше да бидат надминати сите бирократски процедури во системот и сите пречки, со кои се соочивме во текот на целата реализација на постапката. Искрено благодарам на инвеститорот за неговата лична заложба оваа голема инвестиција да ја лоцира во нашата индустриска зона, која самата по себе со атрактивноста и местоположбата нуди дополнителни можности за развој и на ЛИДЛ, но и на самата зона, како и на кумановското и македонското стопанство во целина. Овој нов стопански капацитет, кој ќе се простира на 63.000 метри квадратни и изграден склад со логистички центар, во иднина очекуваме да вработи над 150 луѓе, но и дополнително да ангажира голем број логистички и шпедитерски компании од градот, регионот, државата и пошироко со непречен транзит на стоки и добра, со што ќе придонесе за зголемување на БДП, не само во општина Куманово, туку и пошироко – истакна градоначалникот Димитриевски.
Лидл Северна Македонија го купи земјиштето во септември 2023 година, преку јавен оглас од општината.
Лидл Северна Македонија е дел од компанијата за малопродажба Лидл, која е една од водечките компании во прехранбената индустрија во Германија и во Европа. Лидл моментално работи со над 12.200 продавници и повеќе од 220 логистички центри и магацини во 31 земја.
Како супермаркет со пониски цени, Лидл го вреднува оптималниот сооднос цена-квалитет за своите потрошувачи. Едноставноста и посветеноста кон процесот ги одредуваат секојдневните делувања во продавниците, регионалните дистрибутивни центри и услугите на компанијата. Lidl Stiftung, како даватели на системски услуги, со седиште во Некарсулм, е одговорен за креирање и за структурата на стандардизираните процеси.
Лидл моментално има околу 376.000 вработени на меѓународно ниво. Динамичноста во секојдневното работење, силата и правичноста во меѓусебните односи го карактеризираат функционирањето на компанијата низ целиот свет. Лидл Северна Македонија досега вработува околу 100 лица и континуирано регрутира нови квалификувани профили од различни области и за различни работни позиции.
Од своето постоење, Лидл презема одговорност за луѓето, општеството и околината. Во Лидл, одржливоста е исполнување на ветувањето за квалитетни производи, достапни секој ден
