Потпретседателот на Европската комисија Маргаритис Схинас вели дека има решение како да ги поттикне младите гласачи да излезат на овогодинешните европски избори.
Неговиот план ја вклучува – Тејлор Свифт.
„Никој не може да ги мобилизира младите подобро од младите“, рече Схинас на прес-конференција. „Младите се тие кои можат најдобро да ги мобилизираат младите да учествуваат, повеќе од комесарите. А кој е подобар за таа задача од личност на годината на магазинот „Тајм“? Навистина се надевам дека некој од нејзиниот медиумски тим ќе ја следи оваа прес-конференција и ќе ѝ го пренесе нашето барање“, рече Схинас.
Мобилизирањето млади гласачи не е ништо ново за Свифт. Минатиот септември, пејачката се обиде да ги охрабри своите 272 милиони следбеници на Инстаграм да се регистрираат за да гласаат и за неколку часа, Vote.org објави повеќе од 35.000 регистрации, што е скок од 23 отсто од минатата година.
Иако во текот на нејзината 20-годишна кариера се обидуваше што помалку да се меша во политиката, Тејлор Свифт сепак одлучи да излезе во октомври 2018 година, кога го поддржа демократот Фил Бредесен во борбата против републиканката Марша Блекбурн во трката за Сенатот во Тенеси.
Свифт, која ја започна европската етапа на нејзината турнеја „Ерас“ што го собори рекордот во пролетта 2024 година (непосредно пред европските избори), ќе настапи во Париз на 9 мај – „Денот на Европа“, потсети Схинас.
