Високиот комесар за човекови права на Обединетите нации (ОН) Фолкер Турк денеска изјави дека е „многу загрижен“ по повикот на Израел до Палестинците да ја напуштат Газа.
„Многу сум вознемирен од изјавите на високи израелски функционери за плановите за префрлање на цивили од Појасот Газа во трети земји“, рече Турк на социјалната мрежа Х.
„Меѓународното право забранува присилно пренесување на заштитени луѓе на окупираната територија или нивно протерување од таа територија“, рече тој. Тој додаде дека „85 отсто од жителите на Газа се веќе внатрешно раселени“. „Тие имаат право да се вратат во своите домови.
За потсетување, израелскиот министер за национална безбедност Итамар Бен Гвир во понеделникот повика на враќање на еврејските доселеници во Појасот Газа по војната и „охрабрување“ на палестинското население да емигрира.
„Треба да промовираме решение што ќе ги охрабри жителите на Газа да емигрираат. Тоа е правилно, праведно, морално и хумано решение“, рече Бен Гвир на состанокот на неговата партија, како што објави на социјалните мрежи.
Како што пренесува Хина, десничарскиот министер за финансии Безалел Смотрич, исто така, во неделата предложи враќање на израелските доселеници во Газа и емиграција на Палестинците. Во 2005 година, Израел ги евакуираше своите војници и околу 8.000 израелски доселеници од Појасот Газа окупиран во 1967 година, како дел од едностраното повлекување со одлука на тогашниот премиер Ариел Шарон.
