Францускиот претседател Емануел Макрон го повика Израел да избегне ескалација, „особено во Либан“, по нападот на израелско беспилотно летало во Бејрут во кој загина заменик-лидерот на Хамас.
Според соопштението на Елисејската палата, Макрон телефонски разговарал со Бени Ганц, поранешен израелски министер за одбрана и член на воениот кабинет, по атентатот на заменик-лидерот на Хамас, Салех Арури во главниот град на Либан.
За време на разговорот, Макрон посочил дека е „суштинско“ да се избегне каква било ескалација, особено во Либан, се наведува во соопштението.
Изразувајќи загриженост за хуманитарната ситуација во Појасот Газа, тој го потсети Израел на неговата обврска да ги заштити цивилите.
Потсетувајќи на итноста за испорака на потребната хуманитарна помош до опколената енклава, Макрон нагласи дека треба да се направат напори за воспоставување траен прекин на огнот со помош на регионални и меѓународни партнери.
Израел не ја презеде одговорноста за нападот
Во напад на израелско беспилотно летало во вторникот во либанскиот главен град Бејрут загинаа најмалку шест лица, меѓу кои и заменик-лидерот на Хамас, Салех Аури.
Палестинската група Хамас го потврди убиството на Арури во Бејрут, како и на двајца команданти на нивното вооружено крило, бригадата Ал-Касам, но Израел официјално не ја презеде одговорноста за нападот.
Тензиите се разгореа долж границата меѓу Либан и Израел поради повремена размена на оган меѓу израелските сили и Хезболах. Тензијата настана во средината на израелската воена офанзива на Појасот Газа по прекуграничниот напад на Хамас на 7 октомври.
Оттогаш, според Министерството за здравство на Газа, загинале најмалку 22.313 Палестинци, а повеќе од 57.000 се повредени.
