Сведоштво на мајка на една од жртвите во училиштето „Владислав Рибникар“ во Белград каде се случи масакр ги расплака судијата и сите во салата. Како што изјавила, на нејзе тешко ѝ паднала ладнокрвноста на осомничениот Коста К. и на неговите родители.
Сузана Станковиќ Чикиќ е мајка на убиеното момче А.Ч.(13) кое било во исто одделение со Коста К. Таа го опишала животот на нејзината фамилија пред и по масакрот кој се случи на 3 мај оваа година. На денот на масакрот, таа вели дека на училиште оделе таа, нејзиниот сопруг и синот Андрија. Го оставиле синот пред училиштето и со сопругот тргнале на работа.
Штом зачекорила на работното место, во лекарската ординација каде што работи ѝ се јавил сопругот и ја прашал:
– Дали виде што се случи во „Рибникар“ имаше некакво пукање…?
Таа продолжува да раскажува:
– Кога јас и мојот сопруг влеговме во таксито што не однесе во болницата во Тиршова, за да видиме дали е нашето дете таму, што се случило со него, нé повикаа родителите на едно од убиените девојчиња, кои ни рекоа: „Ги загубивме ќерките, дојдете во полициската станица Врачар“. Знаете, во таков момент сте во состојба на шок, се тресете, а потоа ги слушате вестите на радио. Го молам таксистот да ја зголеми брзината, а веста гласеше: „Во основното училиште „Владислав Рибникар“ загинаа осум деца и еден чувар и, знаете, светот застана – рече таа и додала:
– Полицијата ни кажа дека детето ни е убиено, но знаете како е…сé уште се надевате дека е живо, бидејќи немате потврда, не сте го виделе мртво. Знаете, ние му купуваме работи, неговите омилени патики, а јас му ги подготвувам овие работи, ги пеглам… да го закопам е исто како да го подготвувам за екскурзија. Тоа е состојба на лудило.
