Турскиот претседател Реџеп Таип Ердоган изјави денеска дека израелскиот премиер Бенјамин Нетанјаху не се разликува од нацистичкиот лидер Адолф Хитлер и ги спореди израелските напади врз Газа со односот на нацистите кон еврејскиот народ, пренесоа агенциите.
Говорејќи во Анкара, Ердоган исто така го критикуваше Западот за поддршката на Израел и ја изрази подготвеноста на Турција да ги поздрави прогонетите поради нивните ставови за конфликтот во Газа.
Не е првпат Ердоган да го споредува Израел со нацистичка Германија. Во јули 2014 година, тој ја обвини еврејската држава дека „го одржува жив духот на Хитлер“ за време на војната во Газа, потсетуваат израелските медиуми.
Ердоган ги засили критиките кон Израел по почетокот на новата војна меѓу Израел и палестинскиот Хамас на 7 октомври.
Тој исто така смета дека Хамас не е терористичка организација и одржува врски со неа. Израел, САД и ЕУ ја сметаат оваа исламска организација за терористичка.
Израел ги отповика своите дипломати од Турција откако турскиот претседател го обвини Израел за воени злосторства.
Турција подоцна го отповика својот амбасадор од Израел.
Двете земји беа сојузници долго време пред Ердоган да дојде на власт, но односите се влошија во 2010 година, откако поморските командоси упаднаа на турски брод што носел помош во блокираниот Појас Газа.
Во таа рација беа убиени десет турски активисти. Оттогаш, односите меѓу двете земји понекогаш се подобруваат, понекогаш се влошуваат.
На крајот на септември Ердоган и Нетанјаху се сретнаа во Њујорк. Тоа беше нивна прва средба на која разговараа за можноста за соработка.
