Независниот синдикат на професионални војници поднесе кривична пријава против 10 лица до ОЈО, од кои 7 познати лица и едно Н.Н., лице сите вработени во Министерство за Одбрана, како и против две лица вработени во Министерството за труд и социјална политика и едно лице од Централниот регистар.
Според пријавата од Синдикатот, наведените сториле кривични дела Злосторничко здружување (член 394 од Кривичниот законик), Фалсификување или уништување на деловни книги (член 280 од КЗ) и Употреба на исправа со невистинита содржина (член 380 од КЗ), како и Злоупотреба на службена положба и овластување (член 353 од КЗ).
„Сите лица заедно ги направиле кривичните дела со цел да се сопре функционирањето на синдикатот и синдикалните претставници како и да се изманипулира Министерството за одбрана со нивните противзаконски дејствија.
Веќе подолг период се вршат разни притисоци врз синдикатот со цел да не може да делува и да престане да постои, против сите лица кои ги прекршиле законите и направиле кривично дело се поднесени и други кривични пријави“ – се вели во соопштението на Независниот синдикат на професионални војници СО Скопје.
