Како член на Владата и министер за здравство на утрешната владина седница ќе покренам бескомпромисно прашање што ќе се случи со тие што се вработени на определено од оваа влада и кои работат така некаде четири, пет па и шест години – изјави министерот за здравство Фатмир Меџити, одговарајќи на новинарско прашање за ветувањето дека ќе бидат вработени сите што се на определено работно време, а на некои од нив им завршуваат и договорите на дело.
– Ќе упатам критики кон Министерството за финансии. Шест, седум месеци договарам заедно со министерот за финансии (Фатмир Бесими). Премиерот тогаш нè назначи мене, министерот за финансии и Фондот за здравствено осигурување на Република Северна Македонија. Направивме групи, работевме на тоа, јас навистина макотрпно работев и не знам зошто не се случува ова. И утре како член на Влада, како министер за здравство ќе го покренам многу динамично и бескомпромисно ова прашање, што ќе се случи со тие што се на определено веќе од оваа влада, некаде четири, пет години или шест години договорци на дело – рече министерот Меџити.
