Иако постојат многу начини на кои можеме да го заштитиме здравјето на нашите очи, овој орган најчесто го запоставуваме. Од оние кои се сметаат за изложени на висок ризик од губење на видот, дури 40 отсто не ги прегледале очите во изминатата година, според американскиот Центар за контрола и превенција на болести.
Оптометристот Мишел Холмс изјави за Huffpost дека повеќето луѓе стануваат благодарни за нивната визија само кога ќе наидат на проблем.
Холмс наведува дека крвните садови лоцирани во предниот дел на окото имаат важна цел – кога окото е воспалено или иритирано, тие се шират и отекуваат:
„Тоа е она што предизвикува белиот дел од окото да изгледа црвено“.
Иако може да е резултат само на благ проблем, како прашина во окото или настинка, не треба да се игнорира можноста за сериозна здравствена состојба.
Во секој случај, повеќето луѓе веднаш се потпираат на капки за очи за да го ублажат црвенилото. Имено, овие капки делуваат само на крвните садови за да ги стеснуваат и да исчезне црвенилото. Тие привремено ги побелуваат очите, но всушност само го прикриваат проблемот.
„Она што ме загрижува за овие капки за очи е тоа што тие можат да се користат за маскирање на црвенилото, а често тоа црвенило е симптом на посериозен здравствен проблем“, објасни Холмс. Во некои случаи, луѓето стануваат зависни од овие видови капки и на тој начин не успеваат да го решат основниот проблем.
Д-р Холмс вели дека е подобро да се одлучите за капки за очи без конзерванси (вештачки солзи), бидејќи тие се понежни за очите.
Конечно, ако вашето око е црвено и иритирано, посетете оптометрист. Побезбедно е да се дијагностицира и елиминира проблемот на време отколку да се игнорира.
