Американскиот милијардер и сопственик на социјалната мрежа Х поранешен Твитер, Илон Маск, денеска во Ерусалим треба да разговара со израелскиот претседател Исак Херцог за борбата против антисемитизмот на Интернет, соопшти израелското претседателство.
Во разговорот кој ќе се одржи попладне ќе учествуваат претставници на семејствата на заложниците кои ги држи палестински Хамас, а акцент ќе биде ставен на потребата од дејствување во борбата против растечкиот антисемитизам на интернет, се вели во соопштението од кабинетот на претседателот на Израел.
Посетата на Маск во Ерусалим доаѓа на последниот ден од примирјето меѓу Израел и палестинското исламистичко движење Хамас, во кое беа ослободени три групи заложници кои Хамас ги држеше во Појасот Газа во замена за палестинските затвореници во израелските затвори.
Израелската војска проценува дека вкупно околу 240 заложници биле однесени во Газа на 7 октомври за време на нападот на Хамас на израелска територија. Според израелските власти, во тој напад загинале 1.200 луѓе, главно цивили.
Како одговор, Израел вети дека ќе го елиминира палестинскиот Хамас, кој е на власт во Газа од 2007 година.
Еврејските организации укажуваат на зголемување на антисемитските дејствија во различни земји од почетокот на војната меѓу Израел и палестинскиот Хамас.
Белата куќа минатата недела го обвини Маск дека прави „жалосно промовирање на антисемитска и расистичка омраза“ во една од неговите објави на неговата социјална мрежа Твитер.
Маск одговори на објавата на еден од корисниците на Твитер кој напиша дека Евреите поттикнуваат „омраза против белците“, со порака „ја кажа правата вистина“.
Белата куќа смета дека објавата само ја повторува популарната теорија на заговор на „белите националисти“ дека Евреите имаат таен план да ја поттикнат илегалната миграција во западните земји со цел да го поткопаат белото мнозинство.
Во септември, пред да почне војната меѓу Израел и Хамас, израелскиот премиер Бенјамин Нетанјаху се сретна со Маск, кој е сопственик на Tesla и SpaceX, во Сан Франциско и разговараше со него на форум.
„Се надевам дека ќе најдете капацитет да ставите крај на антисемитизмот (на мрежата Х) или да го намалите колку што е можно во границите на слободата на говорот“ – му рекол Нетанјаху на Маск.
