Руските трупи најверојатно извршиле злосторства против човештвото по нивната окупација врз Украина, соопшти независна истражна комисија. Извештајот на тројца адвокати од Австрија, Швајцарија и Чешка го нарачаа 45-те земји-членки на Организацијата за безбедност и соработка во Европа (ОБСЕ) и е објавен денеска во Виена.
Тројцата експерти не донесоа конечна пресуда дали се сторени злосторства против човештвото. Сепак, тие истакнаа дека одредени обрасци на руското насилство „најверојатно ја исполнуваат таа квалификација“.
Тие вклучуваат насочени убиства и киднапирања на цивили, вклучително и новинари и официјални лица. Според општа дефиниција, масовните или систематски напади врз цивили се сметаат за злосторства против човештвото.
Според извештајот, руските единици јасно ги прекршиле своите должности да ги заштитат цивилите. Во спротивно, бројките на жртвите би биле многу помали, а многу помалку домови, болници и училишта би биле уништени, се вели во извештајот.
– Мисијата откри јасни обрасци на кршење на МХП (Меѓународното хуманитарно право) од страна на руските сили, се вели во извештајот, додавајќи дека не се преземени никакви мерки на претпазливост, ниту пак се поштедени места како училишта и болници.
И покрај негирањата на Русија, во извештајот се вели дека нападот на 9 март на породилиштето и детската болница во Мариупол го извршила Русија и оти одговорните извршиле воено злосторство.
Исто така, се тврди дека нападот на Драмскиот театар во Мариупол на 16 март, во кој беа убиени 300 луѓе, е воено злосторство.
Дмитриј Песков, портпарол на рускиот претседател, изјави дека Русија не се согласува со изјавата на американскиот претседател Џо Бајден дека руската политика во Украина е геноцидна.
Песков им рече на новинарите дека таквите изјави се „тешко прифатливи“ од претседател на САД.
– Ние категорично не се согласуваме со нив. Сметаме дека ова е неприфатлив обид да се искриви ситуацијата на овој начин, особено е тешко да се прифати за претседателот на САД – рече Песков.
Тој ја опиша САД како „земја која извршила добро познати дела во текот на модерната и поновата историја“.
