Јавно и транспарентно, како што се водеше во целиот изминат период Меѓународниот конкурс за Расадник, денес беа објавени резултатите за идејно решение за ДУП за оваа градска четврт во Кисела Вода. Два од вкупно пет пристигнати труда, освоија еднаков максимален број на поени и рамноправно го поделија првото место, како најдобар одговор на барањето на Општина Кисела Вода за обезбедување на хумано живеење во населбата Расадник. Се работи за проекти на проектантска куќа од Хрватска, AG PLANUM doo и од група архитекти од Грција, предводени од Alexios Tzompanakis, за кои одлучуваше стручната меѓународна жири комисија. Третото место го освоија Team PUPA, Life over space, од Литванија, а беше откупен и еден труд од професори и студенти од Меѓународен Балкански Универзитет од Македонија.
Настанот го отвори градоначалникот Орце Ѓорѓиевски кој беше иницијатор на конкурсот, но кој ,како што вети, од самиот почеток до крајот, беше изоставен од одлуките. Тој даде кус осврт на случувањата со Расадник за кој претходното раководство на општината предвидуваше изградба на 99 згради.
– Сите заедно сме сведоци на почетокот на новата ера на владеење на правото во општина Кисела Вода и на транспарентно водење политики во служба на граѓаните. Денес финализираме проект кој претставува своевидна револуција во урбанистичко-архитектонското делување во Македонија бидејќи тој овозможи одговорно, транспарентно, стручно и хумано планирање на изгледот на урбаната заедница Расадник. За прв пат после изборот на планот на Кензо Танге за обнова на постземјотресно Скопје во 1965тата, Општина Кисела Вода распиша Меѓународен конкурс за избор на идејниот лик на ДУП-от за Расадник и денес ги имаме резултатите. Почитувани, често пати го добивам прашањето дали по овој конкурс Расадник навистина ќе биде заштитен од бетонизација односно дали избраното решение навистина ќе оневзможи изградба на стотици згради. Веднаш ќе ви одговорам со ДА. Предлог планот за Расадник од 2020 година на претходната општинска гарнитура во делот кој денес е зелена површина односно неизградениот дел од Расадникот предвидуваше 99 згради и скоро 1 милион м2 станбена површина додека за градежни парцели со намена зеленило имаше површина од околу 10,000 м2. Сите пристигнати трудови од меѓународниот конкурс, сите денес изложени решенија, како што може и сами да видите, имаат над 100.000 м2 зелена површина односно Кисела вода и Скопје добиваат нов Градски парк со површина од над 100.000 м2, што е за 10 пати поголема зелена површина од предложениот Урбанистички план во 2020 година. Во однос на станбени објекти, вкупната етажна површина за градење со намена домување во неизградениот дел од Расадникот изнесува максимално 192,400 м2, што е за 80% помала од предлог планот од 2020 година- изјави градоначалникот Ѓорѓиевски кој се заблагодари на жири комисијата и на поддршката на целокупната стручната јавност во Македонија од областа на урбанизмот до Архитектонскиот факултет во Скопје, Комората на овластени архитекти и инженери и Асоцијацијата на архитекти на Македонија, на професорите од Политехничкиот универзитет во Торино кои денес беа присутни заедно со деканот од овој универзитет, како и на граѓаните кои беа дел од Партиципативното тело.
Резултатите ги објави Претседателот на жири комисијата, деканот на Архитектонскиот факултет во Скопје, Огнен Марина, кој истакна дека Меѓународниот конкурс за Расадник е резултат на еден визионерски и одговорен процес на создавање подобра иднинa за граѓаните на Кисела Вода и Градот Скопје и дека соработката на Општина Кисела Вода со стручната јавност треба да биде добра пракса која треба да ја следат и другите општини. Потоа тој говореше за критериумите од кои се водела жири комисијата и ги објави имињата на наградените.
– Жири комисиjата одржа шест седници, на кои врз основа на извештајот за исполнетост на основните услови од објавата на конкурсот, како и исполнетост на проктната задача, со посебен осврт на квантитативните параметри, исполнетост на посебни услови (изводливост, етапност, економичност, конструкција, ускладеност со важечки прописи и други аспекти, донесе заедничка одлука која е афирмативна во процесот на организација и реализација на меѓународниот архитектонско-урбанистички конкурс и соодветна на квалитетот на пристигнатите проекти – изјави претседателот на жири Комисијата, професорот Огнен Марина, наведувајќи ги наградените.
На Меѓународниот конкурс за Расадник се доделија две први рамноправни награди, едно трето место и еден откуп.
AG PLANUM doo, Хрватска – Marko Cvjetko, mag.ing.arch, Miron Hržina, mag.ing.arch, Ivica Keršić, mag.ing.arch, Dunja Sloković,mag.ing.arch и Elena Tikvić,mag.ing.arch.
Alexios Tzompanakis, Грција – Angeliki Benioudaki, architect, Diamantaki Maria, Goula Marianna, Klouvidaki Emmanouela, Kokouva Athina, Krystalogianni Eleni, Ouranou Argyro и Palaiologos Georgios.
Трето место: „Team PUPA, Life over space“, Литванија – Tadas Jonauskis, Јustina Muliuolyte, Lukas Kulikauskas, Hristina Sekuloska и Jurate Volkavičute”.
Откуп: “Меѓународен Балкански Универзитет”, Македонија – Prof. Dr. Aleksandar Andovski, Asst. Prof. Dr. Marija M. Janakieska, Asst. MSC Nadica Angova Kolevska, Fatih Seifulla, Sadik Saipi, Esra Aliti, Edi Ademi, Samir Bekteshi, Arman Kacaniku, Abdul Kerim Sejfulla, Cenisa Telak, Revajet Abdirrahmani, Belkize Osmani, Andrej Proshevski, Angelina Stojkovska и Asrit Limani.
Сите пристигнати трудови се јавно изложени во Домот на култура “Билјана Беличанец”, а изложени се и трудовите на студентите од Архитектонскиот факултет при УКИМ-Скопје, како и студентските проекти од мастер студиите на Одделот за архитектура и дизајн на Политехничкиoт универзитет во Торино, кои не се натпреваруваа на конкурсот. За ликот на Расадник твореа и основците од неколку училишта во Кисела Вода и нивните цртежи,исто така се дел од изложбата.
