Кинескиот претседател Си Џинпинг пристигна во Сан Франциско, каде ќе учествува на самитот на Азиско-пацифичката економска соработка и денеска ќе се сретне со американскиот претседател Џозеф Бајден.
Како што пренесуваат медиумите, Кси Џинпинг и Бајден ќе се сретнат на „тајна локација“ во пошироката област на Сан Франциско.
Сепак, извори на Гласот на Америка велат дека Бајден и Кси Џинпинг ќе се сретнат во имотот Филоли јужно од Сан Франциско, каде околу четири часа ќе разговараат за билатерални и глобални прашања.
Имотот Филоли зафаќа 265 хектари природа и вклучува палата во архитектонски стил на колонијална преродба, со градини по примерот на англиската ренесанса, овоштарник кој се простира на 2,8 хектари и 1,6 километарска патека за пешачење.
Кси и Бајден пристигнаа во Сан Франциско вчера, пред средбата која ќе опфати работен ручек, обиколка на имотот и блиска средба со присуство на советникот за национална безбедност Џејк Саливан и државниот секретар Ентони Блинкен.
Кинескиот претседател треба да присуствува на два приеми со избрани лидери во американската деловна заедница и општество подоцна денеска.
Официјален претставник на американската влада се очекува да го претстави Кси, пред кинескиот лидер да им се обрати на „американскиот и кинескиот народ“, изјави за Гласот на Америка еден од поканетите учесници, кој побара да остане анонимен.
Кинеските власти побараа поинаква локација за разговорите од онаа на која се одржува самитот на АПЕК и подолг состанок од минатогодишниот состанок во Бали, Индонезија. Минатиот ноември Бајден и Кси разговараа три часа на маргините на самитот на Г-20.
Лидерите на САД и Кина се среќаваат во време кога меѓу двете земји има многу несогласувања, меѓу другото и во однос на Тајван, трговијата, технологијата и човековите права.
Американските власти нагласуваат дека целта на Вашингтон е одговорно да го реши прашањето за конкуренцијата со Кина.
Сепак, од Владата во Пекинг велат дека конкуренцијата не треба да ги дефинира односите меѓу двете најголеми светски економии.
Портпаролката на кинеското Министерство за надворешни работи, Мао Нинг, оваа недела, за време на прес-конференција во Пекинг, рече дека „конкуренцијата на големите земји“ е против актуелниот тренд и не нуди решение за „проблеми во Америка или предизвици во светот“.
Тоа е прва посета на Сио на САД од 2017 година, кога во Белата куќа престојуваше републиканскиот претседател Доналд Трамп и ќе биде прва средба меѓу двајцата лидери по една година.
