Украина се подготвува за „најлошата зима“ во својата историја со големи прекини на струја поради руски ракетни напади, изјави министерот за надворешни работи Дмитриј Кулеба. Тој за германски „Велт“ откри дека купил „десетици свеќи“, а дека неговиот татко купил камион со огревно дрво во пресрет на нападите.
Министерот истакна дека на Киев не би му пречело ако Германија не му обезбеди ракети „Таурус“ со долг дострел, ако наместо тоа испрати повеќе системи за противвоздушна одбрана, додавајќи дека Украина ќе направи сѐ за да ги заштити своите електрани.
Германија не сака да му обезбеди на Киев оружје со долг дострел. Германскиот канцелар Олаф Шолц објасни дека не сака овие ракети да се користат против цели во Русија. Коментирајќи го ова прашање во септември, германската министерка за надворешни работи Аналена Баербок го опиша ова оружје како исклучително софистицирано, додавајќи дека „кога ќе испорачаме нешто, тоа мора да работи на терен“.
Ставот дека Украина ѝ претстои тешка зима го сподели и шефот на Советот за национална безбедност Алексеј Данилов, кој во септември рече дека највисоките украински функционери разговарале за ова прашање во многу прилики, додавајќи дека, исто така, тоа зависи од локалните заедници кои треба да им обезбедат на луѓето електрична енергија.
Во октомври, украинскиот министер за енергетика, Герман Галушченко, призна дека ако Русија изврши масовни напади врз енергетската инфраструктура, „тие би предизвикале значителна штета на електричната мрежа“, со потенцијал за прекини. Тој ги повика луѓето да купат генератори и да преземат други мерки.
Претходно во јули, тој процени дека руските напади оштетиле околу 50 отсто од сите капацитети за производство на електрична енергија, а некои од штетите не се поправливи.
Русија првпат започна со големи напади врз украинската енергетска инфраструктура во октомври 2022 година, како одговор на, како што го опиша како „терористички напад“ на стратешкиот мост на Крим.
