Бактериската вагиноза е најчеста вагинална инфекција кај жените. Според Центрите за контрола и превенција на болести (ЦДЦ), оваа состојба погодува речиси 30 отсто од жените на возраст меѓу 15 и 44 години. Се јавува кога има прекумерен раст на бактерии, што ја нарушува природната pH рамнотежа на вагината.
Одредени фактори на ризик за развој на бактериска вагиноза се вагинално миење, бременост, нов сексуален партнер, неупотреба на кондом или интраутерина направа. Може да и се случи на секоја жена, дури и сексуално неактивна, иако таква појава е ретка.
Не постои безбеден начин да се избегне бактериска вагиноза, но можете да го намалите ризикот со избегнување на вагинално туширање, ограничување на сексуалните партнери, користење латекс кондоми и носење памучна долна облека.
Кои се симптомите на бактериска вагиноза?
Некогаш нема никакви симптоми, а доколку ги има, тие обично вклучуваат целосно бел, сив, зеленикав, воден вагинален исцедок и карактеристичен „мирис на риба“ кој може да биде посилен за време на менструалниот циклус или после сексуалниот однос. Помал чест симптом е чешање или болка, вели д-р Џенифер Вејдер за „Јаху њуз“, пренесува Index.hr.
Бактериската вагиноза не е сексуално пренослива инфекција, но може да го зголеми ризикот од добивање сексуално преносливи инфекции, како што се кламидија или гонореја, според ЦДЦ.
Ова може да доведе до воспалителна болест на карлицата. Ако имате бактериска вагиноза додека сте бремени, се зголемува и ризикот од предвремено породување.
Како се лекува бактериската вагиноза?
Добрата вест е дека оваа состојба е излечива. Инфекцијата се дијагностицира со земање примерок од вагинална течност при гинеколошки преглед и лабораториска анализа. Третманот обично вклучува земање антибиотици.
Студијата од 2021 година покажа дека бактериската вагиноза може да се повтори за шест месеци во повеќе од 50 проценти од случаите. Затоа е важно да земате антибиотици до крај и да се обидете да спречите враќање на инфекцијата.
Бактериската вагиноза се смета за блага инфекција, но може да ве направи поподложни на сериозни здравствени состојби. Доколку почувствувате некој од симптомите, не ја одложувајте посетата на гинеколог.
