Властите во Газа денеска објавија ажурирани податоци за убиените во израелските воздушни напади, јавува Скај Њуз.
Според локалното Министерство за здравство во изминативе денови загинале 1.417 луѓе, меѓу кои и 447 деца и 248 жени.
Во соопштението се наведува и дека од саботата, кога почнаа израелските воздушни напади на Газа, ранети се 6.268 лица.
„Здравствениот систем почна да колабира. Бројот на повредени лица е поголем од клиничките можности на болниците, дури и откако тие беа проширени и повредените се сместени во ходниците“, се вели во денешното соопштение на Министерството за здравство на палестинската управа.
Израелската воздушна кампања против Газа почна по ненадејниот и силен напад на Хамас врз Израел, при што убиени се повеќе од 1.300 Израелци.
