Палестинските милитанти извршија голем ракетен напад врз Израел рано наутро во саботата. Во нападите загинаа најмалку 300 луѓе, а беа повредени илјадници Израелци. Израелскиот премиер Бенјамин Нетанјаху изјави дека земјата е во војна.
На нападите одговори израелската армија – повеќе од 230 Палестинци беа убиени во Газа, а повеќе од 1.600 беа ранети. Најлошиот напад врз Израел во последните децении предизвика војна за која двете страни ветија дека ќе ескалираат.
Израел ги евакуира населбите во близина на границата со Газа
Израелската армија соопшти дека ги евакуира израелските населби во пограничната област со Газа поради војната со палестинската екстремистичка организација Хамас.
Илјадници луѓе мораа да бидат евакуирани внатре во Израел, изјави во неделата портпаролот на израелската армија Ричард Хехт.
Армијата го прогласи подрачјето околу крајбрежниот појас за забранета зона. Се уште има осум точки во јужен Израел каде војската трага по можни напаѓачи, рече Хехт. Оградата кон Појасот Газа беше пробиена на 29 точки, од кои сите сега се под контрола. Според Хехт, потенцијалните нови напаѓачи ќе бидат нападнати од воздух на овие точки.
Нетанјаху ги предупредува луѓето да ја напуштат Газа
Израелскиот премиер Бенјамин Нетанјаху ги повика жителите да ја напуштат Газа бидејќи Израел ќе претвори нејзини делови „во урнатини“.
„Сите места каде што Хамас е распореден, се крие и оперира во тој злобен град, ќе ги претвориме во урнатини. Им велам на жителите на Газа: заминете сега, бидејќи ќе употребиме сила насекаде“, рече тој.
Нетанјаху најави долга војна. „За оваа војна ќе биде потребно време. Ќе биде тешко, претстојат предизвикувачки денови“, рече тој, додавајќи дека Израел ќе победи.
