Од 2021 година уделот на луѓе со екстремно десничарски ставови во германското општество силно се зголемил, покажаа резултатите од новата студија, објави германската агенција dpa.
Сега, секој дванаесетти возрасен има екстремно десничарски ставови, според истражувачите од Универзитетот во Билефелд.
Со 8,3 проценти, тој процент значително порасна од околу два до три проценти во претходните години.
Поголем е и уделот на испитаниците кои се гледаат десно од центарот, 15,5 отсто. Во претходната анкета тие беа нешто помалку од 10 проценти.
Студиите за екстремно десничарските ставови во општеството се нарачуваат на секои две години од Фондацијата Фридрих Еберт, која е блиска до Социјалдемократската партија на Германија.
Авторите предводени од Андреас Зик ја дефинираат централната карактеристика на десничарскиот екстремизам како „идеологија на нееднаквост и насилство или одобрување на насилството за спроведување на идеологијата“.
Во споредба со претходните години, значително повеќе испитаници изјавиле дека слободата на изразување е ограничена во Германија. Има и повеќе луѓе кои се „за зачувување на етничката чистота, различните народи да не се мешаат едни со други“, пренесува dpa.
Во телефонската анкета на Институтот УАДС од 2 јануари до крајот на февруари учествувале 2.027 лица. Врз основа на вкупниот примерок, маргината на грешка е 2,2 отсто.
Речиси една третина, 30 отсто од испитаниците, се согласуваат со изјавата „владејачките партии го мамат народот“, речиси двојно повеќе од пред две години.
Уделот на оние кои одобруваат насилство во политиката е повеќе од двојно зголемен и сега изнесува 13,2 отсто. Пред две години беше 5,3 отсто.
