Најмалку 27 руски војници во Доњецк кои се обиделе да се повлечат од своите позиции биле убиени од пријателски оган, тврди украинскиот пратеник Јуриј Мисијагин, додавајќи дека војниците се повлекле „на нови позиции хаотично и речиси во паника“.
Како што наведува овој пратеник во украинскиот парламент во порака на Телеграма од 10 септември, руските сили претпоставиле дека нивните сопствени војници се всушност Украинци кои сакале да ја окупираат територијата на аеродромот во Доњецк и отвориле оган врз нивните соборци.
„Резултатот беше 27 мртви и 34 ранети, а неколку парчиња опрема беа изгубени“, објави Мисијагин.
Костијантин Машовец, полковник во украинските вооружени сили, во објава на Фејсбук на 10 септември рече дека пријателскиот оган најверојатно започнал поради лошата координација на Русите.
„Од некоја непозната причина, непријателската артилерија почна да пука, не во близина на линијата на фронтот или зад украинските позиции за да ја потисне нашата огнена моќ, туку на позициите и задниот дел на оваа единица“, рече тој.
Инсајдер пишува дека ова не би било првпат руските сили да убиваат свои војници. Во август, заменик-командантот на баталјонот на 129-та бригада за територијална одбрана на Украина изјави за Њујорк Тајмс дека видел руски војници како пукаат од нивна страна. Војник со прекар „Керсон“ рече дека видел како руските сили испукале ракети на бојното поле токму кога нивните војници почнале да се повлекуваат.
„Тие закопаа многу свои момци“, изјави Херсон за Тајмс.
