Холандските деца постојано се рангирани како најсреќни во светот. Токму тоа го поттикна психологот Вероника ван дер Кле да размисли што поинаку прават родителите во таа земја за да воспитаат посреќни и поотпорни деца.
Врз основа на нејзиното искуство со работа со семејства во Холандија, како и нејзиното лично искуство во одгледувањето две девојчиња, таа дошла до заклучок дека родителите во Холандија имаат шест правила кои ги следат.
Велосипедот како превозно средство
Во Холандија постои велосипедска култура која се развива од рана возраст. Штом бебето може да седне, се става на детското седиште и се вози наоколу со родителите, без оглед на временските услови.
„Возењето велосипед на дожд или лапавица, во соодветна опрема, секако, ќе ги научи децата дека можат да се надминат сите пречки во животот. Тоа ги учи и на независност. Повеќето деветгодишници возат сопствени велосипеди до и од училиште. Оваа слобода и доверба им помага на младите да се развијат во автономни и самоуверени возрасни луѓе“, изјави таа за CNBC.
Тие никогаш не ги надгледуваат строго своите деца
Многу е вообичаено холандските деца слободно да трчаат низ игралиштето без преголем надзор.
„Еден родител имигрант ми кажа дека бил шокиран кога првпат посетил холандско игралиште. Сите родители седеа на клупата и тивко разговараа, додека нивните деца трчаа и паѓаа на сите страни. Но, холандските деца се охрабруваат уште од мали нозе да ја истражуваат својата околина, да веруваат во себе и да ја бришат прашината кога ќе паднат“, објасни Вероника.
Никогаш не работат повеќе од 40 часа неделно
Холанѓаните се среќни бидејќи го ценат балансот помеѓу работата и приватниот живот.
Студија од 2021 година покажа дека речиси половина од работната сила во Холандија работи со скратено работно време. Татковците во Холандија, исто така, земаат барем еден слободен ден секоја недела за да го поминат со своите деца.
Тие имаат заеднички оброк
Холанѓаните веруваат дека јадењето е време кога членовите на семејството се поврзуваат и разговараат, па затоа се трудат да имаат барем еден заеднички оброк дневно.
Чувството на поврзаност го подобрува менталното здравје на сите членови на семејството и придонесува за посреќни, емоционално поурамнотежени деца.
Тие никогаш не ја отфрлаат структурата
Од моментот кога ќе се родат нивните деца, на холандските родители им се советува да обезбедат „рѓа, реинхеид, регелмаат“, што грубо во превод значи „одмор, чистота и структура“.
„На холандските деца постојано им се дава јасен дневен распоред кој овозможува многу дремење и дава приоритет на стабилноста. За да напредуваат децата им треба структура, предвидливост, одмор и хигиена. Тоа им помага да се чувствуваат безбедно и удобно истражувајќи го непознатото. Овој облик на поавторитативно родителство често се поврзува со позитивниот развој на детето“, тврди психологот, пренесува Index.hr.
Никогаш не велат дека зборот им е последен
Холандските родители сакаат нивните деца да се чувствуваат и видени и слушнати. Тие ги вклучуваат своите деца во процесот на донесување одлуки веднаш штом ќе го разберат јазикот и ќе комуницираат.
„Вака децата учат да преговараат и да поставуваат лични граници уште од мали нозе. Кога ги прашуваме нашите деца за нивното мислење и вистински ги слушаме, тие имаат поголема веројатност да развијат чувство на позитивна самодоверба. И родителите во Холандија не бегаат да зборуваат за непријатни теми како што се сексот и дрогата. Сфаќаме дека прифаќањето на нашите деца такви какви што се е сè што им е потребно за да прераснат во самоуверени, среќни и урамнотежени возрасни“, заклучи таа.
