Новиот подсој на коронавирус „Ерис“ е евидентиран е во Србија. Институтот за јавно здравје на Војводина денес соопшти дека го потврдил присуството на омикронската подваријанта ЕГ. 5 (наречена Ерис) на територијата на Јужнобачкиот округ, јави дописникот на МИА од Белград.
„Центарот за вирусологија на Институтот за јавно здравје во Војводина го идентификуваше присуството на оваа варијанта на корона со анализа на геномот на вирусот САРС-ЦоВ-2 со помош на методот на секвенционирање на новата генерација, од примерок од биолошки материјал обезбеден на 30 август 2023 година година, како дел од рутинскиот надзор над ковид“, соопштија од Институтот за јавно здравје од Војводина.
Светската здравствена организација (СЗО) претходно изјави дека сојот ЕГ.5 не претставува голема закана за јавното здравје и дека нема докази дека предизвикува потешка болест во споредба со другите видови кои моментално циркулираат.
Според СЗО, Ерис првпат бил регистриран во февруари 2023 година, а оттогаш бројот на заразени со оваа подваријанта постојано расте.
Експертите наведуваат дека нема докази дека подваријантата ЕГ. 5 предизвикува симптоми кои се различни од веќе познатите.
Симптомите на Ерис се треска, постојана кашлица, промени во чувството за вкус и мирис, замор, течење на носот, болки во грлото.
Пред два дена, подсојот заедно со типот Форникс беа регистрирани во Црна Гора.
фото: МИА
