Пет луѓе загинаа, а 37 се повредени при удар на руска ракета во центарот на Чернихов, град на северот на Украина, соопшти министерството за внатрешни работи. Меѓу повредените се и 11 деца.
Чернихов се наоѓа во близина на границата со Белорусија. Русија го зазеде градот на почетокот на инвазијата, но подоцна беше вратен под контрола на украинските сили.
„Би-Би-Си“ пренесува дека оштетувања има на главниот плоштад, на зградата на универзитетот и на театарот.
„Еве што значи да живеете во соседство на терористичка држава. Руска ракета го погоди срцето на Чернихов. Плоштадот, политехничкиот универзитет, театарот… Русија претвори една обична сабота во ден на болка и загуба. Има мртви, има ранети“, напиша украинскиот претседател Володимир Зеленски на Телеграм.
Во меѓувреме, Русија тврди дека украински дрон погодил воен аеродром во северозападниот регион Новгород.
„Како резултат на терористички напад на територија на аеродромот, изби пожарот на паркингот за авиони кој набрзо беше изгаснат од противпожарната служба“, објави руското Министерство за одбрана на Телеграм.
Од таму додаваат дека еден авион е оштетен, но нема информации за жртви.
Украина засега не се изјасни за наводниот напад со дрон.
