Претседателот на Партијата на пензионерите Илија Николовски, имал проблем со притискање на соодветното копче на системот за гласање, но за да не бара поединечно изјаснување, беше оставено со 70 гласа да биде изгласан дневниот ред. Инаку, тој постојано беше со коалицијата – уверува премиерот Димитар Ковачевски откако денеска двајца пратеници од владејачката коалиција не го поддржаа дневниот ред во Собранието, пренесува Република.
Всушност, едниот пратеник не гласал затоа што „го згрешил копчето“, а другиот бил отсутен. Првиот е поранешниот генерал-мајор на АРМ, сега претседател на Партијата на обединетите пензионери која е во коалиција со СДСМ, Илија Николовски, а вториот е пратеникот од СДСМ, Диме Велковски.
-Велковски денеска не беше присутен во Собранието, беше најавено неговото остуство, што не значи дека нема да биде присутен на наредните седници – појаснил Ковачевски, пренесува Република.
Повикувајчи се на извори од СДСМ, дел од медиумите објавија дека луѓето од највисокото раководство на партијата денеска се обидувале да го најдат Велковски и да го убедат да се појави на седницата.
