Најмалку 55 луѓе загинаа во катастрофалниот шумски пожар на Мауи, соопштија локалните власти во петокот, а се стравува дека бројот на жртвите ќе биде поголем бидејќи потрагата по исчезнатите продолжува.
„Додека пожарникарите продолжуваат да работат, денеска се потврдени уште две жртви во активниот пожар во Лахаина. Ова го зголемува бројот на загинати на 55“, рече округот Мауи.
Најмалку 20 лица се здобиле со тешки изгореници, а некои се во критична состојба.
Повеќе спасувачки тимови со кучиња трагачи беа испратени во Мауи од државата Калифорнија и Вашингтон.
Началникот на полицијата во Мауи, Џон Пелетиер, рече дека голем број луѓе сè уште се водат како исчезнати, но тешко е да се каже точно колку, делумно поради телекомуникациските проблеми.
Околу 11.000 домаќинства се уште се без струја, пишува порталот poweroutage.us.
Официјални лица од округот Мауи процениле дека пожарот што ја зафатил поранешната кралска престолнина е локализиран околу 80 отсто.
„Изгоре до темел“, рече градоначалникот на Мауи Ричард Бисен за историскиот крајбрежен град Лахаина.
Гувернерот на Хаваите Џош Грин рече дека речиси сите згради ќе мора да се обноват, што ќе чини милијарди долари и ги повика хотелите да сместат илјадници луѓе кои останаа без покрив над главата.
Поставени се најмалку шест засолништа, а речиси 30.000 туристи се евакуирани, објави Си-Ен-Ен, повикувајќи се на туристичките власти.
