Шест финалистки на овогодинешниот избор за убавина Мис Универзум во Индонезија ги обвинија организаторите дека ги принудиле да се соблечат за да ги „проверат нивните тела“ и ги фотографирале топлес, пишува „Си-ен-ен“. Девојките поднеле пријава во полиција.
Нивната адвокатка Мелиса Анграини додала дека организаторите побарале од девојките да се соблечат за да ги „испитаат нивните лузни, целулит или тетоважи“. Таа тврди дека „проверки на телото“ не биле наведени во распоредот на настаните, а на крајот петте девојки се согласиле да се соблечат и да се фотографираат топлес.
„Тоа беше доволно за да ги понижи и деградира“, рекла Мелиса. Исто така, една од натпреварувачките тврди дека организаторите ја замолиле да позира со раширени нозе.
Девојките рекле дека фотографиите се направени додека во собата биле присутни машки вработени.
Наводните инциденти се случиле на 1 август, два дена пред големото финале во Џакарта, а до судот како доказ биле доставени документи и видеа.
„Мис Универзум многу сериозно ги сфаќа обвиненијата за сексуално злоставување и непримерност. Обезбедувањето безбедно место за жените е највисок приоритет на организацијата Мис Универзум и ние го истражуваме ова прашање“, изјавија организаторите на изборот за Мис Универзум за американските медиуми.
Организаторите на натпреварот во Индонезија не дадоа официјална изјава, но директорката Попи Капела рече дека нејзината организација „внимателно ја следи ситуацијата“ и дека ќе спроведе темелна истрага и ќе ги разгледа обвиненијата.
ФОТО: Инстаграм
