Советникот за национална безбедност на Белата куќа, Џон Кирби, изјави дека главната цел на самитот во Џеда е да се претстави мировната формула на украинскиот претседател Зеленски на што повеќе земји.
Украина и нејзините сојузници планираат да добијат глобална поддршка за мировната формула на украинскиот претседател Володимир Зеленски на разговорите во Саудиска Арабија овој викенд.
Во ексклузивното интервју за украинскиот сервис „Гласот на Америка“, Кирби рече дека не станува збор за мировни преговори за завршување на војната, која, како што нагласи, може веднаш да заврши доколку рускиот претседател ги повлече војниците од Украина.
„Клучната компонента на тоа е, и тоа не смееме да го заборавиме, територијалниот интегритет и суверенитет, бидејќи формулата на претседателот Зеленски се заснова на таа идеја, на тој основен принцип на Повелбата на ОН“, рече тој.
Кирби додаде дека се чини малку веројатно рускиот претседател Владимир Путин да седне на преговарачка маса со Зеленски и оти дотогаш позицијата на Украина треба да се смета за основен елемент и целосно да се почитува во случајот на преговорите.
„Путин не покажува дека е подготвен да преговара. Всушност спротивното. „Гледаме повеќе напади во последните 48 часа на пратки со жито на Дунав“, рече тој.
Кирби смета дека Путин прави се што може за да ја задржи „територијата што не му припаѓа во источна Украина“ и да ја намали способноста на Украина за извоз на жито.
