Вештачката интелигенција може прецизно да открие 20 отсто повеќе случаи на рак на дојка во споредба со мамограмите и другите традиционални методи за дијагностицирање, покажуваат раните резултати од тестот спроведен во Шведска.
Студијата е прва од ваков вид што ја испитува употребата на вештачка интелигенција во дијагнозата на ракот, а се спроведува во време кога пејзажот на технологијата и нејзината регулација драстично се менуваат, пишува Politico.
Прелиминарните резултати, објавени доцна во вторникот во списанието Lancet Oncology, откриваат дека користењето на вештачка интелигенција во анализата на мамограм, со еден или двајца радиолози, ги има истите резултати како и анализата на мамограм од двајца радиолози без вештачка интелигенција и открива 20 отсто повеќе видови на рак.
Употребата на вештачка интелигенција, исто така, носи значително намалување на обемот на работа за радиолози, бидејќи лекарите трошат 44 проценти помалку време на анализа на мамографи.
Студијата се уште е во тек, а се спроведува во Шведска на примерок од 80.000 жени. На половина од учесниците им ги читале мамограмите од радиолози без помош на вештачка интелигенција, а на другата половина им ги анализирале мамограмите и од вештачка интелигенција и од радиограф – освен во случаите кога вештачката интелигенција открила највисок степен на ризик, кога тестовите биле дополнително анализирани од двајца радиолози.
Резултатите беа објавени во услови на значително зголемување на интересот за потенцијалните можности и ризици кои вештачката интелигенција ги претставува во медицината и пошироко. Вештачката интелигенција се повеќе се користи за медицински цели, но постојат и стравувања за начинот на кој се развиваат и потврдуваат алгоритмите во овие околности, како и за потенцијалот за прекумерна дијагноза и пристрасност.
Во исто време, Европската унија планира да воведе строги регулативи за употреба на вештачка интелигенција, а Европската медицинска агенција работи на проценка на ризиците и придобивките од оваа технологија во развојот на лекови.
Потребни се дополнителни тестови.
И покрај позитивните резултати, водечкиот автор на студијата, Кристина Ланг од Универзитетот Лунд во Шведска, вели дека прелиминарните резултати „само по себе не се доволни за да потврдат дека вештачката интелигенција може да се вклучи во мамографскиот скрининг“. Ланг и нејзините колеги чекаат дополнителни резултати од тестовите за да покажат дали употребата на вештачка интелигенција го намалува бројот на откриени случаи на рак помеѓу тестовите и дали вреди да се спроведе.
„Најголемиот моментален потенцијал на вештачката интелигенција е тоа што го намалува обемот на работа на радиолози“, вели Ланг, додавајќи дека вештачката интелигенција може да ја елиминира потребата од друг радиолог, дозволувајќи им на лекарите да им помогнат на повеќе пациенти.
Стивен Дафи, професор по тестирање на тумор на Универзитетот Квин Мери во Лондон, ги коментираше резултатите, велејќи дека намалувањето на обемот на работа на радиолози „е од големо значење во многу програми за скрининг на рак на дојка“. Сепак, тој додаде дека постои опасност вештачката интелигенција погрешно да дијагностицира безопасни лезии.
Ова е прво рандомизирано испитување кое ја проучувало употребата на вештачка интелигенција при читање мамограф, но и едно од првите кое ја проучувало употребата на вештачката интелигенција во областа на радиологијата. Во една статија објавена во јануари во списанието European Radiology се тврди дека ваквите видови тестови се важни за проучување на безбедноста на системите за вештачка интелигенција, кои можат да произведат „непредвидени и невидливи грешки кои не можат да се објаснат со човечка логика“.
