Руската инвазија на Украина повторно го покрена прашањето за легализација на канабисот за медицински цели во таа земја, каде, според Министерството за здравство, 57 отсто од Украинците се изложени на ризик да развијат посттрауматско стресно нарушување поради војната.
„Во војна, болката станува проблем за сите делови од населението“, изјави за Политико Тарас Ратушњи, активист и основач на групата „Марш на слободата на канабисот“, која се залага за легализација на канабисот.
Законот за создавање легална домашна индустрија за медицински канабис го помина своето прво читање во украинскиот парламент на 13 јули.
Согласно предложениот закон, би се воспоставил систем за лиценцирање за одгледување канабис и на здравствените установи и претприемачите ќе им се овозможи да купуваат, транспортираат, складираат и издаваат лекови на база на канабис.
Лекарите ќе можат да ги препишат.
Сепак, според законот, канабисот се уште е забранет, што го попречува истражувањето и развојот, а ги збунува правилата околу неговата употреба, пишува Политико.
Пратениците сега се обидуваат да го изменат законот пред неговото второ читање наесен.
Во Украина имаше неуспешен обид да се легализира канабисот за медицински цели во 2019 година, но војната промени сè.
„Денес има повеќе од два милиони луѓе во Украина на кои очајно им требаат лекови за канабис. Разбираме дека ќе има уште повеќе такви луѓе по завршувањето на војната, на ранетите војници со ПТСН особено им требаат такви лекови“, изјави претседателот на комисијата за здравствена заштита во украинскиот парламент, Михаил Радучки.
Предлог-законот, поднесен од украинската влада во јуни 2022 година, доби широка поддршка, меѓу другите, од украинското Министерство за здравство, Државниот совет за безбедност и одбрана, украинскиот претседател Володимир Зеленски и повеќе од 40 украински онколози.
