Стар римски товарен брод, потонат пред повеќе од 2.000 години, е пронајден во близина на Рим, соопшти уметничкиот оддел на италијанската полиција.
Бродот се наоѓал во морето во близина на пристаништето Чивитавекија, на околу 80 километри северозападно од главниот град на Италија, на песочно морско дно на длабочина од околу 160 метри, соопшти специјалната полиција.
Бродот, кој се проценува дека е долг повеќе од 20 метри и датира од 1 или 2.век п.н.е., носел стотици амфори, кои главно биле пронајдени недопрени.
„Извонредното откритие е важен пример за бродолом на римски брод кој се соочил со опасностите од морето во обид да стигне до брегот и сведочи за древните поморски трговски патишта“, истакнуваат од италијанската полиција.
Потонатиот брод бил лоциран и снимен од робот на далечински управувач, соопштија полициски извори. Се уште не е јасно дали властите ќе се обидат да го извлечат бродот или неговиот товар од дното на морето.
