Севернокорејскиот лидер Ким Џонг Ун се сретна со рускиот министер за одбрана Сергеј Шојгу за да разговараат за воените прашања и регионалната безбедносна средина, објавија денеска државните медиуми.
Официјалната севернокорејска централна новинска агенција објави дека Ким и Шојгу одржале разговори во главниот град Пјонгјанг во средата и постигнале консензус за неодредени „прашања од взаемен интерес во националните одбранбени и безбедносни власти и регионалната и меѓународната безбедносна средина“.
Асошиетед прес јавува дека за време на средбата, Шојгу му предал на Ким „топло и љубезно писмо“ потпишано од рускиот претседател Владимир Путин, пренесе КЦНА. Извештајот не ги прецизираше воените прашања за кои се разговараше.
Во средата Шојгу разговараше и со севернокорејскиот министер за одбрана Канг Сун Нам, чија цел беше „зајакнување на соработката меѓу нашите одбранбени оддели“, се наведува во соопштението на руското Министерство за одбрана.
