Само неколку дена по веста дека данскиот ракометар Микел Хансен се враќа на терените по една година пауза, сега доаѓа информација дека тој има рекордна милионска понуда и најверојатно ќе го замени данскиот Алборг со Саудиска Арабија.
Како и во фудбалот, саудиските клубови почнаа да трошат огромни пари и во ракометот. Прво беше ангажиран португаскиот репрезентативец Андре Гомеш во Ал Сафа за ракометно фантастични 900.000 евра по сезона, а сега Микел Хансен на маса има понуда тешка 6 милиони долари што доколку се реализира, би бил највреден трансфер во историјата на ракометот.
Минатата сезона Хансен ја шокираше јавноста кога по неколку месеци игра изјави дека има психички проблеми и му е потребен одмор. Ја заврши сезоната, а потоа се врати на теренот на подготовките на Алборг за новата натпреварувачка сезона. Но, сега искусниот Данец најверојатно ќе ја продолжи кариерата во Саудиска Арабија.
35-годишниот Микел Хансен во својата богата кариера настапуваше за ГОГ, Барселона, Копенхаген, ПСЖ и Алборг, а за Данска на 252 натпревари има постигнато 1.302 гола. Со Данците освои европско, светско и олимписко злато.
